Fy Hawliau

Fe ddylai’r cartref fod yn lle diogel i bob plentyn a pherson ifanc. Oherwydd ei bod yn well i bob plentyn a pherson ifanc dyfu i fyny ‘gartref’ gyda’u rhieni, eich rhieni sy’n bennaf gyfrifol am ofalu amdanoch a’ch helpu i dyfu a datblygu. Mae llawer o’r hawliau sydd gennych fel plentyn neu berson ifanc yng Nghymru yno i wneud yn siŵr eich bod yn byw gyda’ch rhieni a’u bod yn gofalu amdanoch yn iawn.Weithiau, mae rhywbeth yn mynd o’i le, ac mae sefydliadau a phobl ar gael yng Nghymru i ddiogelu plant. Bydd y sefydliadau hyn yn helpu os oes angen, er mwyn gwneud yn siŵr eich bod yn cael eich diogelu rhag niwed ac yn cael digon o ofal. Ymhlith rhai o’r sefydliadau a’r bobl sy’n gwneud hyn mae’r gwasanaethau cymdeithasol a’r awdurdod lleol lle rydych yn byw, yr heddlu, y llysoedd a barnwyr.Os oes angen cynnwys oedolion a sefydliadau eraill – efallai fod rhywun sy’n byw gyda chi’n eich brifo neu efallai eich bod wedi gorfod gadael eich cartref am resymau eraill – mae eich hawliau yno i wneud yn siŵr bod yr oedolion a’r sefydliadau hynny’n eich diogelu ac yn gwneud yr hyn sydd orau i chi.Os oes angen help arnoch nawr, ffoniwch 999 neu siaradwch ag oedolyn y gallwch ymddiried ynddo – un o’ch athrawon efallai, neu aelod arall o’r teulu.

Os oes gennych ‘hawliau’, mae’n bwysig gwybod sut i’w defnyddio. Fe ddylai eich teulu – eich rhieni neu berthnasau eraill rydych yn atoch atynt ac aelodau o’ch cymuned, eich gofalwyr maeth neu eich gwarcheidwaid – eich helpu i ddeall eich hawliau a sut maen nhw’n gallu eich diogelu wrth i chi dyfu i fyny. Gartref, mae eich hawliau yno’n bennaf i’ch diogelu chi a’ch teulu. Mae nhw yno i wneud yn siŵr y gallwch dyfu a datblygu’n ddiogel gyda’ch rhieni. Os yw hynny’n digwydd, ddylech chi ddim gorfod defnyddio eich hawliau.